Juventusi ka zbritur menjëherë në fushë pas barazimit të Firences. Bardhezinjtë u mblodhën në Continassa për të përgatitur ndeshjen kundër PSG-së, të martën në mbrëmje, në Paris, në debutimin e tyre në fazën e grupeve të Ligës së Kampionëve. Lajme të mira nga Rabiot, që mungoi në ndeshjen në transfertë kundër Fiorentinës për shkak të një goditjeje në kofshë të pësuar kundër Spezias: francezi u stërvit me grupin dhe për këtë arsye është në dispozicion të Allegrit. Për tu vlerësuar gjendja e Di Marias, i freskët nga një dëmtim në aduktor i pësuar në ndeshjen e parë kundër Sassuolos dhe i "zëvendësuar si masë paraprake pasi ai kishte bërë vetëm dy seanca stërvitore" (siç tha Allegri në fund të ndeshjes) pas 45' kundër Fiorentinës.
Jo në maksimum të gjendjes fizike edhe Danilo, që ndjeu një problem në kavilje, por gjithsesi qëndroi në fushë në Franchi deri në fund, duke shtrënguar dhëmbët. Bardhezinjtë pas seancës në orën 11.15 në Continassa, në orët e para të pasdites do të nisen për në Paris ku në Parc Des Princes pritet konferenca për shtyp e Allegrit dhe një lojtari në orën 18.45.
