Partia Demokratike ka vijuar me denoncimet lidhur me aferën e inceneratorëve. Këtë të martë, deputeti demokrat Belind Këlliçi ka thënë se me anë të kësaj afere korruptive janë bërë të pasur një grusht njerëzish në kurriz të qindra mijëra shqiptarëve. Këllliçi shtoi se inceneratorët e Fierit, Elbasanit dhe Tiranës nuk djegin asgjë veç 430 milion eurove të parave publike.
Gjatë fjalës së tij, deputeti u ndal edhe tek shkatërrimi i pishinës së resortit turistik ‘Prestige Resort’ si dhe tek dosjet e sigurimit, duke thënë se Rama e kupton që po i vjen data e skadencës e për këtë arsye po sulmon vazhdimisht kundërshtarët.
“Një e moshuar në azilin e Tiranës u gdhi milionere pa e ditur. Një të vdekure në Shkodër iu gjetën miliona në konton bankare. Një mbledhëseje kanoçesh dhe një bariu u kishin dhuruar ‘çunat problematikë’ para sa për një fabrikë Coca Cola. Siç e kemi provuar me dokumente, Edi Rama dhe mafia e djegësve kanë rezervuar bonuse e miliona edhe për median dhe shefat e saj. Për baballarët e deputetëve rrogat ishin sa të një futbollisti të Serie A.
Inceneratorët e Fierit, Elbasanit dhe Tiranës nuk djegin asgjë veç 430 milion eurove të parave publike dhe tokën nën këmbët e Edi Ramës. Për këtë ai nxjerr shërbyesit e pushtetit për të manipuluar me dosje Sigurimi për kundërshtarët politikë. Apo çon ruspat për të prishur pishinat ku deri dje lahej, pronë e një botuesi, të cilin deri dje e kishte mik për zemër.
Sa herë e vërteta është bërë e padurueshme, Edi Rama ka kërkuar të shpikë realitete paralele. Tërheqja e vëmendjes së publikut, dhe jo qeverisja e mirë, ka qenë, që në fillim, i vetmi zanat dhe angazhim i tij. Ai nuk e përballon dot popullin opozitar te i cili më 7 korrik ka parë një kundërshtar të fuqishëm; Ai nervozohet nga opozita e re e cila është në këmbë, dhe për më shumë është e vërtetë, jo gjasme dhe jo part-time; Ai e di se një pushtet i blerë vjen me një datë skadence.”, shkraun Këlliçi.
