Të martën pasdite në Casteldebole është parashikuar të bëhet konfrontimi vendimtar mes drejtuesve të Bolonjës dhe trajnerit të tyre Sinisa Mihajlovic. Tema kryesore e takimit ballë për ballë do të jetë ndarja e mundshme e rrugëve mes trajnerit dhe shoqërisë, gjithnjë e më e shqetësuar për mbarëvajtjen e këtij sezoni. Skuadra duket se po vuan dhe paraqitjet nuk janë të mira, me vetëm tre pikë të sjella në shtëpi e fryt i tre barazimeve me Veronën, Salernitanën dhe Spezian. Këtë verë, lojtarët kuqeblu kanë punuar në grumbullim pa trajnerin, që është duke luftuar me leuceminë përmes kurave, dhe Bologna tani po mendon për shkarkimin dhe mundësinë e zgjidhjes së kontratës në mënyrë konsensuale dhe me dëmshpërblim. Mihajlovic, megjithatë, për momentin nuk duket i gatshëm të japë dorëheqjen.
Sipas Corriere dello Sport, plani A do të ishte konfirmimi i Sinisa Mihajlovic për dy ndeshjet e ardhshme, plani B është të përshpejtohet koha e dorëzimit të stafetës. Dy janë emrat në garë për pankinën kuqeblu: Thiago Motta, i freskët nga përvoja e tij me Spezian dhe De Zerbi, i kthyer nga Ukraina. Ndërkohë, skuadra shijon ditën e lirë, në pritje të mësojë rezultatin e takimit mes palëve, për të mësuar se kush do të drejtojë rifillimin e stërvitjeve të planifikuara për të mërkurën.
