Moti i keq ka dëmtuar transformatorin e linjës së tensionit, duke shkaktuar reduktim të furnizimit me ujë të Durrësit. Për këtë arsye, kompania e Ujësjellësit dhe Kanalizimeve në Durrës ka lajmëruar qytetarët se mund të ketë një problem në furnizimin me ujë gjatë dy ditëve të ardhshme.
Njoftimi për shtyp:
Ujësjellës Kanalizime Rajoni Durrës, njofton abonentët se mund të ketë problem në furnizimin me ujë gjatë dy ditëve të ardhshme. Shkak është bërë një defekt që ka ndodhur mëngjesin e sotëm, i shkaktuar nga moti i keq dhe shkarkimet e shumta, në zonën e Fushë Milotit. Për shkak të këtyre shkarkimeve, transformatori kryesor i tensionit 35/20 kv është dëmtuar dhe i gjithë stacioni është jashtë kushteve të punës.
Grupet e punës së OSHEE dhe të Ujësjellës Kanalizime Rajoni Durrës ndodhen në terren për të zëvendësuar transformatorin e djegur. Si pasojë e situatës emergjente, gjatë ditës së sotme dhe nesër, do të ketë reduktim të orarit të furnizimit me ujë për të gjithë bashkinë e Durrësit dhe zonat rurale.
Të ngjashme: Moti i keq, dëmtohet linja e tensionit të mesëm në Fierzë
