Kriza e rritjes së çmimeve nuk ka lënë pa prekur edhe përdorimin e automjeteve. Për 2022 shqiptarët po blejnë më pak makina se vjet. Numri i autoveturave të regjistruara për herë të parë për 8-mujorin 2022 është 12% më pak se e njëjta periudhë se viti i kaluar. Sipas të dhënave të Drejtorisë së Shërbimit të Transportit Rrugor për muajt janar-gusht 2022 janë të regjistruara 41,220 mjete.
Ndërsa për periudhën janar-gusht 2021 ishin të regjistruara për herë të parë 46,902 mjete. Nga totali i mjeteve të regjistruara për 8-mujorin e 2022, 34,019 prej tyre janë autovetura nga 39,908 që ishte numri i automjeteve për të njëjtën periudhë të 2021. Krahasuar me vjet numri i makinave të regjistruara për herë të parë është ulur rreth 15%. Për 2022 numri mesatar mujor i mjeteve të regjistruara për herë të parë rezulton të jetë 5,152 mjete nga 5,862 që ishte vitin e kaluar.
Në janar- gusht 2022 qarku me numrin më të lartë të makinave të regjistruara është Tiranë duke zënë rreth 39% të totalit të 8 mujorit, më pas vjen qarku i Durrësit me 16% të totalit dhe ai i Fierit zë 10%. Rreth 50% e mjeteve këtë vit janë importuar nga Italia dhe Gjermania. Marka më e preferuar e shqiptarëve vijon të mbetet Wolsvagen dhe Mercedes Benz.
Përfaqaqësues të kompanisë “Landeslease” se në këtë periudhë shitjet për makinat e reja kanë shënuar rënie, jo vetëm për shkak të rritjes së çmimit të tyre 10 deri 15% më shumë krahasuar me vjet, por edhe për shkak të numrit të reduktuar të prodhimit të tyre për 2022 e ndikuar nga mungesa e pjesëve prodhuese. Në kahun tjetër kompanitë e shitjes shtojnë se në këtë periudhë po tregtohen më tepër makina të përdorura. Edhe tek ato ka rritje të çmimit. Megjithatë shtrenjtimi i tyre konsiderohet i fryrë i ndikuar nga mungesa e brandeve të makinave të reja.
Rënia e shitjeve sipas DPSHTRR
Për DPSHTRR rënia e automjeteve të reja të regjistruara për herë të parë në 2022 nuk ndikohet nga tendenca botërore e rritjes së çmimeve. Sipas tyre kjo vjen për shkak të vitit pandemik 2020. Mbyllja e ekonomisë dhe lëvizja e kufizimeve solli që shumë regjistrime të shtyheshin për 2021.
“Po të krahasohemi me 2019 janë rreth 10 mijë mjete më shumë. Periudha mars-qershor ka qenë pothuajse e mbyllur. Tetor-dhjetor 2020 ishte kulmi i pandemisë në Shqipëri. Prandaj viti 2021 merr më shumë regjistrime të mbartura për 2020”.
Prej vitit 2021 për makinat që regjistrohen për herë të parë po zbatohet një rregull i ri për kontrollin teknik. Për këto mjete është përcaktuar që kontrolli teknik do të kryehet 3 vite pas regjistrimit.
Deri në dhjetor të 2021 sipas të dhënave të Drejtorisë së shërbimit të Transportit totali i mjeteve aktive ose të çregjistruara përkohësisht ishte 740,669 mjete ku 593,280 janë autovetura. Krahasuar me 2020 numri i autoveturave aktive është 10% më i lartë./Monitor
