"Tashmë jam pak larg, në Arabi. Jam për një vit atje, nuk e di a do të vazhdoj apo jo atje. Në momentin që trajneri mendon se mund të shërbej në kombëtare si brenda dhe jashtë fushe, unë do të jem gjithmonë i gatshëm për kombëtaren". Sokol Cikalleshi ka nisur tashmë një episod të ri në karrierën e tij, duke u transferuar në Arabinë Saudite. Por dëshirën për të dhënë kontributin e tij për kombëtaren nuk e ka humbur aspak. Sulmuesi ka bindjen se me përkushtim maksimal edhe rezultatet do të vijnë: "Këtë javë po punojmë shumë edhe në këtë aspekt. Mendoj që po bëjmë më të mirën për momentin, edhe pse grupi nuk është i plotë. Shpresoj që të bëjmë ndeshjen që të gjithë kërkojmë dhe të arrijmë të marrim rezultatin. Kështu do të realizojmë objektivat që kemi".
Cika zbuloi pastaj se skuadra i ka parë gabimet e ndeshjes së kaluar në video. E gjatë seancave stërvitore është përmirësuar në atë aspekte. Izraeli nuk është një ekip i pakalueshëm sipas tij, duke marrë në konsideratë edhe ndeshjet e kaluara: "Problemi i ndeshjes së fundit është që kemi bërë gabime që mund të evitoheshin. Për këtë gjë po punojmë dhe kemi bërë edhe analizat me video. I kemi parë këto gabimë dhe besoj se do t’i përmirësojmë. Kemi përballë një kundërshtar të vështirë, jemi në një grup më të vështirë se më parë. Duhet të bëjmë më të mirën në aspektin taktik, duke mos pësuar gol dhe pastaj me aftësitë që kemi të arrijmë të shënojmë dhe të marrim tre pikët".
ZGJEDHJA
Për qendërsulmuesin, që me dëmtimin e Uzunit, me shumë mundësi projektohet titullar në krah të Brojës, kjo zgjedhje është edhe më komode se të luajë i vetëm përpara: "Më mirë është të luaj me dy sulmues, pasi kur ke një partner afër, mundësia për të shënuar është më e madhe. Duke qenë se gjithë kohës kemi luajtur me dy sulmues, besoj se do të vazhdojmë të luajmë kështu", përfundoi Cikalleshi.
https://youtu.be/4QjzA4mJzGw
