Kryetari i Partisë Demokratike, Sali Berisha ka zhvilluar një bashkëbisedim online me qytetarët në lidhje me problematikat e tyre. Berisha tha se grevat dhe protestat janë e vetmja mënyrë për të rikthyer shpresën dhe votën e lirë në vend. Thirrja e parë ishte për mësuesit, studentët e gjimnazistët të solidarizohen me protestën e pedagogëve. Ajo është planifikuar të mbahet më 5 tetor.
“Ftoj mësuesit shqiptarë të bashkohen me protestën e pedagogëve. Të përgatiten për një grevë të përgjithshme të trondisin nga themelet regjimin monist. U bën thirrje studentëve dhe gjimnazistëve të mbështesin protestën e 5 tetorit. Ajo është protestë e të gjithë arsimit shqiptar” deklaroi Berisha.
Lexo më tej: Pedagogët dalin në protestë, kërkojnë rritjen e pagave
Berisha tha se do të bëjë gjithçka që vjeshtën ta kthejë në një pranverë të protestave të mëdha kundër Edi Ramës.
Berisha:
Mënyra më intensive e komunikimit tim me ju, ka qenë përmes rrjeteve sociale. Sa i përket protestave, e vërteta është se polarizimi në këtë vend po rritet me shpejtësi dhe shtresa e mesme po shkon drejt asgjësimit e të varfërit po bëhen më të varfër.
Rama votën nuk e pranon dhe i gjithë ky zhvillim dramatik, përmbysje në shtresat e shoqërisë ka një shkak themelor dhunimin e votën prej tij. Protestat janë rruga për të cilën është përcaktuar fronti për shpëtimin e Shqipërisë.
Ju garantoj se do të nisin shumë shpejt. Janë shtyrë, por edhe shtyrja bëhe për shumë aspekte e padurueshme. Grevat e protesta do të jenë rrugët për të rikthyer në Shqipëri shpresën e votën e lirë për të dalë nga regjimi totalitar.
