Kreu i Partisë Demokratike Sali Berisha ka porositur strukturat që të shtojnë angazhimin në rrjetet sociale. Kjo si formë komunikimi me shtresën gri të elektoratit. Ai u shpreh se sot partia në pushte ka një dominancë me postimet në rrjetet sociale. Edhe pse sipas tij interesi për qeverinë është dy herë më e ulët se për opozitën.
“Partia në pushtet sot na dominon në rrjetet sociale. Kanë më shumë se 2-fishin e postimeve në krahasim me ne. Por ata nuk kanë një gjë. Nuk kanë interesin e publikut. Interesi i publikut është dy herë më i madh për opozitën.
Por sa e shfrytëzojmë ne këtë gjë?! Duhet të ecim drejt shtresës gri. Kjo përcakton fitoren. Duhet të jemi në lartësinë e misionit. Kërkohet që secili nga ne të ketë një program ditor. Çdo anëtar i yni të bëjë takime”, - u shpreh Berisha. Ai shtoi se partitë e djathta po kthehen në pushtet në të gjithë Europën.
“Kemi miqtë tanë, të cilët fatmirësisht po kthehen në pushtet në të gjitha anët e Europës, në Suedi, Itali, Bullgari. E pamohueshme se shoqëritë janë ngopur dhe mërzitur me qeveritë e majta të cilat kanë hipokrizinë dhe demagogjinë si armë të tyre kryesore, përkundrejt nesh që kemi vlerat dhe qytetarin të parin.
Ndaj dhe të frymëzuar edhe nga kjo valë ndryshimi, erë ndryshimi që fryn në Europë të vazhdojmë ne këtë betejë. Ju siguroj se me çdo ndryshim ne afrohemi gjithnjë e më e shumë drejt fitores” – tha Berisha. ©LAPSI.al
