Policia e Shtetit ka arritur të provojë se 16-vjeçari Mariglen Gjonaj, i zhdukur në vitin 2015, është vrarë. Kristian Cenaj, 30-vjeç është arrestuar si autor i dyshuar i vrasjes së adoleshentit 7 vite më parë. 30-vjeçari më 18 maj të vitit 2015, dyshohet se ka vrarë Mariglen Gjonajn, për ta vjedhur. Ai ka marrë një orë dore 'Rolex' si dhe varësen e floririt, që i mituri kishte me vete ditën kur është zhdukur.
Në një konferencën për mediat, drejtori i Drejtorisë Vendore të Policisë Lezhë, Vehbi Bushati thotë se autori i dyshuar e ka mohuar të ketë lidhje me ngjarjen. Megjithatë Bushati shton se policia dhe prokuroria kanë prova të cilat dëshmojnë fajësinë e tij.
Lexo më shumë: Eshtrat e gjetura në Kurbin dyshohet se mund të jenë të 16-vjeçarit Mariglen Gjonaj, të zhdukur që nga 2015
Mariglen Gjonaj u zhduk në rrethana misterioze, 7 vite më parë. Xhaxhai i tij bëri kallëzim në prokurori duke thënë se kishte humbur çdo kontakt me nipin e tij. Pas gjetjes së eshtrave të Gjonajt në prill të këtij viti në afërsi të Hidrovorit, prokuroria e Lezhës rifilloi hetimet. Më pas është bërë i mundur identifikimi i autorit, Kristian Cenaj, lindur në Mamurras. Policia ka bërë të mundur ndalimin e 30-vjeçarit për veprën penale "Vjedhja me pasojë vdekjen”.
