Vendet aleate të Ukrainës të udhëhequr nga NATO kanë njoftuar dërgimin e armëve të avancuara të mbrojtjes ajrore në Kiev. Ky vendim vjen pas një morie sulmesh raketore nga Rusia dhe si përgjigje ndaj thirrjes së presidentit rus Vladymyr Zelensky. Armatimi i premtuar nga Britania e Madhe, Kanadaja, Franca dhe Holanda përfshin raketa dhe radarë, edhe Shtetet e Bashkuara kanë bërë më parë një premtim të ngjashëm. Ndërkohë që një sistem i teknologjisë së lartë nga Gjermania është tashmë në Ukrainë. Premtimet vijnë pasi aleatët e Ukrainës nga 50 vende takohen në selinë e NATO-s në Bruksel.
Kievi e përshëndeti samitin dhe e cilësoi “historik”. Disa orë më vonë bombardimet ruse goditën qytetin jugor të Mykolaiv të enjten në mëngjes, thanë zyrtarët. Kryetari i bashkisë së qytetit Oleksandr Senkevich tha se qyteti ishte “bombarduar masivisht” rreth orës 01:00 me orën lokale.
“Një ndërtesë banimi pesëkatëshe u godit, dy katet e sipërme u shkatërruan plotësisht, pjesa tjetër – nën rrënoja. Ekipet e shpëtimit po punojnë në vend,” tha ai.
Java e fundit në Ukrainë ka qenë intensive për shkak të bombardimeve më të rënda ruse në muajt e fundit, kur më shumë se 100 raketa u lëshuan, duke goditur infrastrukturën energjetike dhe objektiva të tjera joushtarake, përfshirë edhe një kënd lojërash për fëmijë.
Të paktën 19 njerëz u vranë në ditën e parë të sulmeve, të cilat përfshinin goditjen në qendër të Kievit. Presidenti rus Vladimir Putin thotë se sulmet me raketa ishin hakmarrje ndaj një sulmi në urën kyçe që lidh Rusinë dhe Krimenë, gadishullin jugor të Ukrainës të aneksuar nga Moska në 2014. Rusia thotë se shpërthimi i së shtunës ishte organizuar nga agjencia e inteligjencës e Ukrainës, një pretendim i hedhur poshtë nga Kievi.
