Zëri qarkullonte prej disa javësh, por impulsin e mëtejshëm e ka dhënë konfirmimi autoritar i gazetës angleze Financial Times. Goldman Sachs dhe Raine Group janë mandatuar për të gjetur një pronar të ri për Interin. Familja Zhang, pronare e grupit Suning që mban shumicën e aksioneve në klubin zikaltër, kanë marrë vendimin për t'u larguar.
Grupi Suning ka punësuar dy këshilltarë për të kërkuar blerës të mundshëm për Interin. Prestigjiozja Financial Times ka rikthyer në vëmendje një lajm që ekziston prej kohësh. Britanikët specifikojnë se klubi zikaltër është mbështetur te Goldman Sachs dhe Raine Group. Kjo e fundit është banka e investimeve që menaxhoi shitjen e Chelsea nga Roman Abrahmovic tek amerikani Todd Boehly për rekordin e 2.5 miliardë paund. Sipas Financial Times, Zhang dhe bashkëpunëtorët e tij, para së gjithash kërkonin një partner, por nëse vjen një ofertë afër 1.2 miliardëve të kërkuar, ata mund të vendosin të heqin dorë.
Suning ka në pronësi Interin që nga viti 2016 dhe së fundmi ka miratuar buxhetin për sezonin 2021-22. Në të është regjistruar një humbje prej 140 milionë eurosh. Komenti i drejtorit ekzekutiv të zikaltërve Marotta për Sky Sport, është gjithësesi mohues: "Këto janë thashetheme të përsëritura, por Suning po vazhdon të respektojë angazhimet e tij. Duhet të fokusohemi vetëm në ngjarjet sportive. Këto janë gjëra që kalojnë mbi kokën time. Nuk mund të mos falënderojmë kompaninë tonë sepse nuk na ka munguar asnjëherë asgjë. Familja Zhang ka shpenzuar qindra milionë euro në menaxhimin e saj dhe ka treguar lidhje me klubin”.
