I dërguari i Shteteve të Bashkuara për Ballkanin Perëndimor, Gabriel Escobar, tha se pret që dialogu midis Kosovës dhe Serbisë për normalizimin e marrëdhënieve, të vazhdojë “në mënyrë dinamike dhe konstruktive”. “Kjo është e rëndësishme si për qytetarët, ashtu edhe për paqen, stabilitetin dhe përparimin e përgjithshëm në rajon”, tha Escobar.
Ai i bëri komentet në Beograd, pas takimit me presidentin e Serbisë, Aleksandar Vuçiç. Vuçiç, në anën tjetër, tha se ka mbajtur “bisedime të rëndësishme” me diplomatin e lartë amerikan. Në llogarinë e tij në Instagram, Vuçiç tha se është biseduar “për të gjitha zhvillimet aktuale” dhe për çështjet e hapura” në dialogun midis Beogradit dhe Prishtinës. Ai tha se ka këmbëngulur në “zbatimin e plotë të marrëveshjeve të arritura deri më tani”, si dhe të së drejtës ndërkombëtare.
Lexo më tej: Escobar: Marrëveshja finale Kosovë – Serbi, çështje javësh
“Serbia, si vend serioz, i besueshëm dhe i përgjegjshëm, vazhdon të luftojë për ruajtjen e popullit dhe vendit të saj, duke bërë përpjekje maksimale për ruajtjen e paqes dhe stabilitetit, si dhe për përparimin e gjithë rajonit”. Kështu u shpreh Vuçiç. Ai pritet të takohet edhe me kryeministren e Serbisë, Ana Bërnabiç. Si dhe drejtorin e Zyrës për Kosovën në Qeverinë e Serbisë, Petar Petkoviç.
Të mërkurën në Prishtinë, ai takoi presidenten e Kosovës, Vjosa Osmani, kryeministrin Albin Kurti dhe përfaqësues të opozitës. Kosova dhe Serbia, me ndërmjetësimin e Bashkimit Evropian dhe mbështetjen e SHBA-së, janë në negociata për normalizimin e marrëdhënieve qysh në vitin 2011. Ato kanë arritur dhjetëra marrëveshje, por zbatimi i shumicës ka ngecur. Takimi i fundit në nivel të lartë, përkatësisht mes Kurtit dhe Vuçiçit, është mbajtur në gusht.
Escobar tha se arritja e një marrëveshjeje mes Kosovës dhe Serbisë është çështje javësh. Ai e dha deklaratën duke folur për një televizion lokal të mërkurën në Kosovë, Pas takimeve të ndara me Escobarin, Osmani dhe Kurti thanë se Kosova është palë konstruktive në dialog. Ata shtuan se Kosova është e gatshme për arritjen e një marrëveshjeje me Serbinë, me në qendër njohjen reciproke. /rel
Lexo më tej: Escobar zbulon çfarë i kërkoi Kurtit dhe Osmanit
Lexo më tej: Weber: Dialogu Kosovë-Serbi po i kthehet thelbit, por marrëveshja është larg
