Është paraqitur në policinë italiane shqiptari Avni Meçja i shpallur në kërkim për vrasjen e bashkëshortes së tij rumune. 35-vjeçarja Alexandra Elena Mocanu u gjet e pajetë në banesën e saj në Bolzano. Rumunia kishte jetuar për disa vite edhe në Verona. Më pas vendosi të shpërngulej pranë shqiptarit që punonte në ndërtim ndërsa ajo si banakiere. Ishin të afërmit e shqiptarit ata që vunë në alarm autoritetet.
Gjatë një telefonate me vëllain e tij, Avni Meçja i kishte rrëfyer se i duhej të arratisej pasi po e kërkonin. Pas kësaj telefonate të afërmit shkuan në banesën e çiftit dhe gjetën gruan e pajetë. Gruaja rumune kishte shenja të dukshme të dhunës. Autoritetet besonin se shqiptari kishte mbërritur në Shqipëri për t’u fshehur. Në rrjetet sociale ata publikonin foto në krahët e njëri – tjetrit, po pas tyre e vërteta ishte krejt ndryshe. Fqinjët deklaruan se i kishin dëgjuar shpesh të grindeshin.
“I kemi dëgjuar shpesh duke u grindur. Nga banesa e tyre dëgjonim zënka të shpeshta me zë të lartë mes të dyve. Kjo ndodhi edhe të shtunën në mbrëmje, deri rreth orës 22.30. Më pas dëgjuam përplasjen e sirtarëve dhe më pas asgjë më shumë. Heshtje deri të dielën, kur mbërriti policia dhe zjarrfikësit për të hyrë në banesë”, - thonë ata për mediat. Viktima duket se është goditur rëndë, ndoshta me një send të mprehtë. Më pas kufoma ishte mbështjellë me një batanije. ©LAPSI.al
