Kreu i PL, Ilir Meta tha se Partia e Lirisë do të bëhet pjesë e primareve me kandidatët e saj dhe për këtë ka gjetur dakortësi me Berishën gjatë takimit që të dy patën në selinë e PD. Meta tha se primaret janë një risi e jashtëzakonshme, por ai i kishte propozuar Berishës, një emër për kryetarin e Këshillit të ri Bashkiak një “superpolitikan” të cilin Berisha ia kishte pranuar.
“Partia e Lirisë respekton primaret. Është një risi e jashtëzakonshme. Kemi kërkuar që sa më shpejt të realizohet ky proces.
Kudo ku ne si Parti e Lirisë kemi kandidate që premtojnë për komunitetin do t’i përfshijmë në primare të përbashkëta. Është e rëndësishme që kandidatët që respektojnë njëri tjetrin dhe kushdo që i shfrytëzon primaret për të dëmtuar kandidatët e tjerë dhe jo për të shpalosur vizionin e tij, të përjashtohet nga gara.
Nuk kam patur asnjë diskutim për emrin që do të jetë në primare, se këtë do ta vendosin primaret. Por i kam propozuar një emër z.Berisha për kryetar të parlamentit të Tiranës, të cilin ai e priti me shumë kënaqësi.
Dhe të jeni të sigurt që parlamenti i ardhshëm i Tiranës do të jetë institucioni më i rëndësishëm deri në parlamentin e ri të Shqipërisë.
Çdo ditë të hënë do të ketë këshill bashkiak të Tiranës për të dëgjuar qytetarët. Nënë Liza nuk do të rrijë më në rrugë e keqtrajtuar nga policia, por do të flasë atje në parlamentin e qytetarëve të Tiranës. Është superpolitikan” u shpreh Meta, që në këtë mënyrë duket se ka mbyllur negociatat me Berishën për mënyrën se si dy partitë do të dalin në zgjedhjet e ardhshme.
