Ish-kryetarja e LSI-së Monika Kryemadhi ka deklaruar se ka dorëzuar fatura të tjera që kanë të bëjnë me inceneratorin e Elbasanit. Kryemadhi u mor në pyetje nga SPAK për rreth dy orë e gjysmë si kallëzuese kryesore e inceneratorit të Elbasanit. Në deklaratën për media Kryemadhi theksoi se janë grabitur me fatura fiktive 7.1 miliardë lekë, ndërsa bën përgjegjës sekretarin e përgjithshëm të Këshillit të Ministrave Engjëll Agaçi.
“Unë sot jam thirrur në Prokurorinë e Posaçme si kallëzuese kryesore e inceneratorit të Elbasanit për të verifikuar të gjithë dokumentacionin dhe për të dorëzuar prova të tjera që i shtohen inceneratorit të Elbasanit. Është shumë e rëndësishme që një nga arsyet kryesore për të cilat ky proces i verifikimit dhe hetimti të dosjeve të inceneratorit nuk është thjesht çështja e një individi, por e sistemit që ka funksionuar në administrimin dhe grabitjen e qytetarëve. Sot paraqita prova të tjera për vjedhjen e inceneratorit e Elbasanit.
I kam kërkuar SPAK që siç është Lefter Koka dhe komisioni i vlerësimit të ofertave edhe sekretari i përgjithshëm i Këshillit të Ministrave zoti Agaçi i cili është në shkelje të nënshkrimit të një kontrate të paligjshme duke hartuar një vendim qeverie 907 që ka të bëjë me financimin e një kontrate të paligjshme. Në bazë të ligjit për organizmin e ligjit të Këshillit të Ministrave sekretari i përgjithshëm harton rendin e ditës në konsultim me kryeministrin, pasi bien dakord duke parë ligjshmërinë dhe kushtetueshmërinë e akteve, miratohen në Këshillin e Ministrave. Dorëzova fatura të tjera që kanë të bëjnë me grabitjen vetëm për inceneratorin e Elbasanit. Nga një projekt i financuar prej 22 milionë eurosh nga qeveria shqiptare 7.1 miliardë lekë janë grabitur me fatura fiktive dhe fryrje punimesh. Kallëzimi është siç është Lefter Koka Alqi Bllako dhe Engjëll Agaçi”.
