Arben Kraja u ankua që në buxhetin e vitit 2022 qeveria në mënyrë të njëanshme dhe të “dhunshme” kishte ndërhyrë me akte normative për të ndërprerë financimet e paracaktuara në buxhet dhe e konsideroi këtë kufizim të pavarësisë së SPAK-ut.
“Herë pas herë me akt normativ është ndërhyrë në buxhetin e SPAK duke ndërprerë fonde të caktuar”- tha Kraja duke shtuar se ai e mirëkuptonte krizën dhe ishte koshient që nuk do të zbatohej gjithë buxheti për shkak të mungesës në personal.
“Një praktikë e tillë nuk duhet bërë më. Nuk duhet të ketë prerje të njëanshme të dhunshme të buxhetit të një institucioni të pavarur sepse mendoj se futet tek kufizimet e pavarësisë së një institucioni për të funksionuar”- theksoi ai para deputetëve.
Deputetët e opozitës e quajtën këtë ndërhyrje në shkelje të Kushtetutës. Sipas Gazmend Bardhit pasi është Kuvendi ai që miraton buxhetin për institucionet kushtetuese dhe nuk mundet shtoi ai që “qeveria të ndryshojë vullnetin e Kuvendit”.
Ndërsa kryetarja e komisionit Klotilda Bushka i quajti raste përjashtimore për shkak të krizës energjitike apo situatës së luftës dhe i kërkoi SPAK që bashkë me Ministrinë e Financave të bien dakord duke gjetur një balancë mes nevojave dhe mundësive.
Kraja kërkoi ndihmë nga komisioni i ligjeve dhe për marrjen e godinës së Ish-Ujësjellësit, e cila i është vënë në dispozicion nga Këshilli Bashkiak i Tiranës.
“Procedura ka mbetur në ministrinë e Drejtësisë. Duhet një vendim që t’i kalojë në administrim ministrisë dhe ajo të na e vendosë ne në dispozicion”- tha Kraja.
Në lidhje me buxhetin e ri, kreu i SPAK, kërkoi që Ministria e Financave të miratojë edhe një shtesë prej 15 punonjësish dhe fonde për investime që lindin gjatë punës.
Ai i quajti kërkesat për fonde të justifikuara me punën e bërë nga SPAK në këto 3 vite.
“Me 2 procese kemi nxjerrë buxhetin për 4 vite, flas për 20 milionë euro të konfiskuara në bankë”- u tha ai deputetëve.
