Ishte 12 tetor kur i ashtuquajturi “Bordi i Transparencës” u mblodh për herë të fundit për të përcaktuar çmimet e naftës, benzinës dhe gazit të lëngshëm për automjetet. Atë pasdite u shpallën nafta 240 lekë të reja për litër (me pakicë), benzina 203 lekë/litri dhe gazi 78 lekë për litër.
4 ditë përpara se të mbahej kjo mbledhje çmimet e karburanteve (sidomos nafta 245 lekë/litri) kishin prekur çmime mjaft të larta. Në atë mbledhje u bë një “korrigjim” i vogël.
Që nga ajo e mërkurë... heshtje. Edhe pse kanë kaluar 20 ditë çmimet e bordit janë “gozhduar” në të gjitha tabelat e karburanteve dhe nuk lëvizin më. Në çdo njoftim Bordi i Transparencës nënvizon se vendimet e tij janë të lidhura me bursën Platss.
Të gjithë e dimë që çmimet në bursa janë mjaft të luhatshme dhe ka pak gjasa që në këtë situatë ato të kenë mbetur të konstante. Nga një vëzhgim i bërë nga lapsi.al shihet se çmimet kanë rënë të paktën 15%. Kështu bursa e Teksasit shënoi këtë ditë të fundit të tetorit çmimin 86 dollarë për fuçi për naftën bruto.
Ndërsa në bursën e Londrës llogaritet në 94.8 dollarë për fuçi.
Gjatë këtyre 20 ditëve bordet e ngjashme në Maqedoninë e Veriut dhe Kosovë kanë ulur çmimet e karburanteve. Çmimi u ul të paktën 2 herë në 5 ditë në Maqedoninë e veriut (Lexo këtu).
Edhe Kosova uli gjithashtu çmimin e karburanteve (lexo këtu).
Vetëm në Shqipëri kanë "harruar" të mblidhen. ©LAPSI.al
