Edhe pse u duk se do të kishte një bashkim mes demokratëve për të dalë në zgjedhjet vendore me një kandidat, negociatat dështuan ditën e djeshme. Grupi Parlamentar i PD-së, i drejtuar nga Enkelejd Alibeaj njoftoi ditën e djeshme se do kërkojë t’i hapet rruga për të dalë me kandidatët e vet. Deputeti Gazment Bardhi ka kërkuar që të mblidhet me deputetët në degën numër 7 të Partisë Demokratike në Tiranë ditën e sotme.
Në rendin e ditës, sipas njoftimit të shpërndarë nga i mandatuari i Enkelejd Alibeajt, Bardhi, janë diskutimet në lidhje me vendimet që lidhen me negociimin e dështuar me grupin e Sali Berishës.
“Nesër, datë 2 Nëntor, ora 18:00; në selinë e Partisë Demokratike Dega 7 (përballë Mondialit), do të zhvillohet mbledhja e Kryesisë së Partisë Demokratike. Me rend dite: Diskutime dhe vendimmarrje mbi qëndrimin e mëposhtëm të Grupit Parlamentar të PD.”
Kujtojmë se dje me deklaratë zyrtare, Alibeaj lajmëroi se kishte ndërprerë çdo negociatë me grupin tjetër. Sipas Alibeajt, grupi i Berishës ishte ulur në bisedime me dy kushte: Njohjen e primareve dhe të lidershipit të Berishës.
Lexo më tej: Dështojnë negociatat, opozita e përçarë drejt 14 Majit
Alibeaj bëri me dije se do të dilnin me kandidatët e tyre në zgjedhjet lokale. Kjo deklaratë u shoqërua nga reagime. Berisha i paralajmëroi kur u tha se “i kishin bërë llogaritë gabim”. Ndërsa i mandatuari i PD-së, Edi Paloka u shpreh se pas Alibeajt sheh “hijen” e kryeministrit Edi Rama.
Lexo më tej: Reagon Berisha: Nuk i preket flamuri PD-së, opozita nuk mund të pengohet
