Policia e Kosovës deklaroi se në orët e para të mërkurës është njoftuar për një zjarrvënie dhe djegien e një makine me targa RKS – Republika e Kosovës, në Zubin Potok. Pronar i kësaj makine ka qenë një qytetar i komunitetit serb.
Policia ka thënë se zjarrfikësit kanë dalë në skenën e incidentit dhe se autoritetet janë duke hetuar rastin.
Ky njoftim vjen një ditë pasi Qeveria e Kosovës ka nisur të zbatojë planin në tri faza për riregjistrimin e makinave me targave ilegale serbe në Kosovë.
Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provë.
Zbatimi i këtij plani pritet të përfundojë më 21 prill. Dhe, nga ajo datë, në qarkullim do të lejohen vetëm makina me targa RKS.
Dita e parë e qortimit: Dilema dhe kundërshtime për targat
Në komunat veriore të Kosovës të banuara me shumicë serbe, Mitrovicë e Veriut, Zveçan, Leposaviç dhe Zubin Potok, llogaritet se janë deri në 10.000 automjete me targa ilegale serbe.
Këto targa i lëshon Serbia dhe bartin akronime serbe të qyteteve të Kosovës, si: KM, GL, PR, UR e të tjera.
Në javët e fundit janë shtuar incidentet në veri të Kosovës. Kryesisht kanë prekur serbët që po riregjistrojnë makinat në RKS.
Institucionet e Kosovës kanë fajësuar “grupet ilegale ekstremiste” për këto incidente.
Lexo më tej: Konflikti Kosovë-Serbi për targat, BBC: Arsye e pamjaftueshme
Autoritetet në Kosovë kanë thënë se nga 1 shtatori deri më 27 tetor kanë regjistruar tri incidente të sulmeve ndaj serbëve. Bëhet fjalë për serbë që i janë përgjigjur kërkesës për riregjistrimin e makinave.
Deri në fund të muajit tetor besohet se rreth 20 makina me targa ilegale serbe janë pajisur me targat RKS.
Përfaqësuesit e Listës Serbe nuk kanë reaguar për djegien e makinave dhe pronave të banorëve serbë. Lista Serbe është partia më e madhe e serbëve në Kosovë.
As Beogradi zyrtar nuk ka komentuar publikisht këto sulme në veri të Kosovës, shkruan REL.
