Chelsea fitoi kundër Dinamo Zagreb dhe mori vendin e parë në Grupin E, përpara Milan. Në Stamford Bridge u mbyll 2-1 për Blues. Miqtë kaluan në avantazh me Petkovic, por brenda pak minutash barazoi Sterling. Vendosi sfidën pastaj Zakaria, me golin që mbylli ndeshjen. Pavarësisht suksesit, tifozët londinezë kanë sulmuar teknikun Graham Potter. Ben Chilwell u dëmtua në sekondat e fundit të shtesës dhe mbështetësit e Blues, por jo vetëm, fajësuan menaxherin. Lojtari anglez tani rrezikon Botërorin.
Mbrojtësi, i cili pësoi një dëmtim të rëndë sezonin e kaluar, luajti plot 90 minuta. Në sekondat e fundit të lojës ai u ndal për një problem në tendinën e gjurit. Dëmtimi i tij tërboi tifozët anglezë. Mbështetësit britanikë fajësojnë të gjithë Potter. Ata nuk e kuptojnë zgjedhjen për të futur në fushë një ekip të fortë, edhe pse Blues e kishin siguruar kalimin në 1/8 e Champions. 25-vjeçari u largua nga fusha duke çaluar, i ndihmuar nga dy mjekë të Chelsea. Më vonë ai u pa duke u larguar nga stadiumi me paterica. Dëmtimi i Chilwell është një lajm i keq si për tifozët e Blues, ashtu edhe për tifozët e Anglisë. Kupa e Botës fillon në më pak se tre javë.
TIFOZËT ANGLEZË TË TËRBUAR ME POTTER
Potter, kështu, e vuri në rrezik formën fizike të Chilwell, në një ndeshje të parëndësishme. Ky është mendimi i tifozëve në rrjetet sociale: “Nuk kam parë kurrë një vendim më idiot nga një trajner. Rrezikon lojtarë jashtëzakonisht të rëndësishëm, por të prirur ndaj dëmtimeve në një ndeshje të panevojshme. Tani një tjetër dëmtim i rëndë për një tjetër nga lojtarët më produktivë në skuadrën e tij. Potter dhe një tjetër marrëzi e tij. Chilwell duhet të ishte zëvendësuar", ka shkruar dikush. Një tjetër shtoi: “Potter ka shumë për t'ju përgjigjur! Vendimi për t'i lënë lojtarët kryesorë të luajnë në një ndeshje të vdekur, në mes të një programi të ngjeshur dhe një krize dëmtimesh, është tmerrues”.
Tifozët e tjerë theksuan se as që duhej të ishin të pranishëm titullarët e tjerë si Mason Mount e Kalidou Koulibaly. Madje edhe Thiago Silva, i cili hyri gjatë ndeshjes. Pas takimit, Potter mbrojti zgjedhjet e tij, veçanërisht atë të lejimit të Chilwell të luante për 90 minuta.
