Pas arrestimit të 50-vjeçarit Xherxh Laçi që ngujoi familjen, i cilësuar nga policia si radikalist, detaje të reja janë zbuluar. Mësohet se gjatë dëshmisë, Laçi ka mohuar të ketë dhunuar bashkëshorten apo dy djemtë, përkatësisht 15 dhe 17 vjeç. 50-vjeçari ka thënë se nuk linte fëmijët të dilnin nga banesa për të mos u infektuar.
“Kam ndjekur parimet e mia fetare. Fëmijët dhe bashkëshorten nuk i kam lënë të dalin për t’i ruajtur nga e keqja. Nuk doja që ata të nisnin drogën apo të infektoheshin”, ka pohuar Laçi.
Nga ana tjetër, dy djemtë dhe nëna e tyre kanë treguar në prani të psikologëve se ata dhunoheshin sistematikisht. Ata janë dërguar në një qendër rehabilitimi. Xherxh Laçi pritet të dalë të martën në Gjykatën Penale të Tiranës për t'u njohur me masën e sigurisë.
Fillimisht kanë qenë komshinjtë që lajmëruan policinë pasi dyshuan se Xherxh Laçi mund të kishte dhunuar familjarët. Pasi ka mbërritur policia, Laçi është shprehur se jetojnë në kushte të veshtira ekonomike. Gruaja e tij nuk punonte. Fëmijët nuk i dërgonte në shkollë për shkak të besimit radikal dhe frikës se mos infektoheshin apo merrnin rrugë te keqe.
Më pas është mësuar se Laçi kishte ngujuar bashkëshorten e tij për 6 vite me radhë në zonën e '5 Majit’ në Tiranë. Prej 1 viti, 50-vjeçari ngujoi edhe dy fëmijët e tij, të cilët nuk i kishte lënë të vazhdonin gjimnazin. Vetë Laçi dilte nga shtëpia vetëm ditën e premte, pasi shkonte në xhami për t'u falur.
Pas operacionit të zhvilluar, në banesë janë gjetur dy thika, shkopinj druri dhe 700 fishekë të cilët i kishte groposur në oborrin e shtëpisë.
