Disa javë pas shpalljes së pafajësisë nga akuzat për korrupsion, për të cilat ai ishte në gjyq, Sepp Blatter është kthyer të flasë. Ish-kreu i FIFA-s ka dhënë një intervistë të gjatë për gazetën zvicerane Tages Anzeiger. Ajo që spikati ishte zbulimi që Blatter bëri në lidhje me zhvillimin e Kupës së Botës në Katar. Zgjedhja u bë kur ai ishte ende në krye të FIFA-s, por ka një prapaskenë.
Kupa e Botës në Katar, i pari në “dimër” në historinë e futbollit, është vetëm dy javë larg. Por polemikat rreth kompeticionit nuk tregojnë asnjë shenjë zbutjeje. Shkelja sistematike e të drejtave të njeriut dhe e punëtorëve dhe tronditja e kalendarëve, kanë krijuar debate të ashpra. Caktimi i Kupës së Botës në Katar u bë në vitin 2010, kur Sepp Blatter ishte ende në krye të FIFA-s. Vite më vonë, ish-numri 1 i futbollit botëror pranoi se zgjedhja ishte një gabim.
DEKLARATA E BUJSHME
Zgjedhja e Katarit ishte një gabim”, tha Blatter. “Në atë kohë, komiteti ekzekutiv i FIFA-s kishte vendosur t'i jepte Kupën e Botës 2018 Rusisë dhe atë të 2022 Shteteve të Bashkuara. Si një gjest paqeje mes dy kombeve armike prej kohësh. Pastaj diçka ndryshoi kur telefonoi Sarkozy”. Ish-presidenti i FIFA-s më pas kritikoi pasardhësin e tij Gianni Infantino: “Pyes veten: përse presidenti i ri jeton në Katar? Nuk mund të jetë kryetar i organizatës lokale. Nuk është puna e tij. Katari ishte një gabim, është një komb shumë i vogël dhe futbolli është shumë i madh për atë vend.
