Të paktën gjashtë persona janë vrarë dhe 81 janë plagosur në një shpërthim në një zonë të frekuentuar në qendër të Stambollit. Shpërthimi ndodhi rreth orës 16:20 me orën lokale të dielën. Bomba plasi në një rrugë tregtare në zonën e sheshit “Taksim”. Një i dyshuar është arrestuar. Këtë e ka deklaruar shefi i policisë turke, përkatësisht ministri i Brendshëm.
Zëvendëspresidenti Fuat Oktay tha më herët se shpërthimi mendohej të ishte një sulm terrorist i kryer nga një grua. Ndërkohë presidenti Rexhep Tajip Erdogan ka theksuar se autorët do të ndëshkohen.
Duke folur në një konferencë shtypi në Stamboll, ai dënoi atë që ai e quajti “sulmin e poshtër”.
Ministri i Drejtësisë, Bekir Bozdag, citohet të ketë thënë për mediat turke se një grua ishte ulur në një stol në zonë për më shumë se 40 minuta, duke u larguar vetëm disa minuta para se të ndodhte shpërthimi.
E të hënën në mëngjes, Ministri i Brendshëm, Suleyman Soylu ka bërë të ditur se një person i dyshuar se kishte lënë bombën ishte arrestuar nga policia dhe akuzoi Partinë e Punëtorëve të Kurdistanit (PKK) për përgjegjësi.
PKK është një grup militant që bën thirrje për një shtet të pavarur kurd brenda Turqisë. BE dhe SHBA e konsiderojnë atë si një organizatë terroriste, shkruan BBC.
