Pas Italisë nuk ka shumë kohë në dispozicion për të reflektuar për kuqezinjtë e Edoardo Rejas. Të shtunën është një tjetër test, ai kundër Armenisë. E për më tepër tekniku italian duhet të bëjë llogaritë me "firot". Sigurisht që do të ketë ndryshime, duke patur parasysh ata që duhet të kthehen në klubet e tyre dhe ata që janë të dëmtuar. Përvec Armando Brojës të dëmtuar, nga grumbullimi janë larguar edhe Odise Roshi e Myrto Uzuni.
Roshi e Uzuni janë kthyer të klubet e tyre. Kjo sipas marrëveshjes paraprake që Sakaryaspor e Granada kishin me Federatën Shqiptare të Futbollit. Roshi pati një impakt të jashtëzakonshëm me ndeshjen, kur zëvendësoi Brojën në minutën e 50. Wingeri pati dy mundësi të mira për të shënuar, i ndalur nga Meret. Ndërsa me shpejtësinë e tij vuri në provë prapavijën italiane. Uzuni në krahun tjetër, ka bërë një sforco të madhe, duke qenë se ka ndeshjen me klubin spanjoll mbrëmjen e sotme. Traversa i mohoi golin kundër Italisë beratasit, që shpreson të korigjojë shënjestrën në Segunda. Edhe pse sigurisht do të kishte dashur të ishte në fushë kundër Armenisë.
Në dyshim është Ardian Ismajli. Por mbrojtësi mund të shtrëngojë dhëmbët, sidomos nën euforinë që ka krijuar goli i parë kuqezi në histori kundër të kaltërve.
