Kryetari i Partisë Demokratike Sali Berisha ka nisur një komunikim “live” me qytetarët në rrjetin social “Facebook”. Ai e nisi fillimisht duke përkujtuar tërmetin e 26 nëntorit të vitit 2019. Ai akuzoi qeverinë Rama se ka përdorur fatkeqësinë e shqiptarëve për të vjedhur fonde dhe kjo ka ndodhur tek ndërtimet.
“Qeveria e ka përdorur për dy qëllime. Qëllimi i parë ka qenë të vjedhë. Çdo ndërtim i bërë me fondet e taksapaguesve shqiptarë për tmerrin ka kushtuar 5 herë më shtrenjtë se ato të bëra nga autoritete turke dhe donatorë të tjerë. Së dyti i përdori ata në mënyrë kriminale për të blerë vota. Kjo qeveri shpërndau në fushatë tek militantët 160 mln euro tërësisht. Sot janë me qindra familje që jetojnë tek të afërmit e tyre dhe në çadra. Për 51 shpirtra të marrë, absolutisht nga korrupsioni qeveritar pasi banesat ishin bërë të pabanueshme nga tërmeti i shtatorit nuk ka asnjë drejtësi. Në vend që të ishin të burgosur ministra dhe zv. ministra, të ishin arrestuar drejtorë, të kishte dhënë dorëheqjen Edi Rama. Por jo, ata u liruan dhe Edi Rama grabiti mandatin e tretë.”, tha Berisha.
