Mbrëmjen e djeshme 31-vjeçarit Gert Shehu, që sulmoi liderin e PD-së Sali Berisha, i është komunikuar arrestimi. Mësohet se Shehu është ende në spitalin e Traumës dhe masa e arrestit i është komunikuar aty. Vetë 31-vjeçari nuk ka pranuar të thotë asnjë fjalë për sulmin e kryer.
Kujtojmë se Shehu goditi mesditën e djeshme kreun e Partisë Demokratike Sali Berishën, në bulevardin “Dëshmorët e Kombit”, gjatë protestës të thirrur nga opozita. Pas grushtimit, autori u neutralizua nga truprojat e Berishës. Sot ish-kryeministri, Berisha pritet të paraqitet në drejtorinë e Policisë së Tiranës për të dëshmuar mbi sulmin ndaj tij. Mbrëmjen e djeshme janë shoqëruar në polici për të dhënë dëshminë e tyre, dy prej truprojave të kryedemokratit.
