Kryetari i Partisë Demokratike, Sali Berisha ka pritur në një takim ish-anëtarin e Këshillit Bashkiak të Bashkisë së Nju Jorkut dhe Asamblesë së Shtetit të Nju Jorkut, Mark Gjonaj. Nëpërmjet një postimi në rrjetet sociale, Berisha ka postuar disa foto nga takimi. Kryedemokrati shkruan se është shprehur angazhimi për krijimin e kushteve të votës së diasporës.
Berisha ka shtuar se për shkak të keqqverisjes nga Edi Rama dhe dhunimit të votës qytetarët janë larguar masivisht nga vendi.
"Duke e falënderuar Z.Gjonaj për vizitën e tij, gjeta rastin t’i shpreh mirënjohjen më të thellë atij dhe të gjithë diasporës sonë për kontributin e vyer ndër vite. Diaspora shqiptare në SHBA e ka çuar çështjen tonë kombëtare në nivelet më të larta të administratës amerikane. Diaspora është tanimë një realitet global, një forcë drejtuese ndryshimi dhe një aset i paçmueshëm. Ndaj saj shteti shqiptar ka detyrime të pamohueshme.
Zoti Gjonaj foli gjerësisht për rolin dhe potencialin e madh që ka diaspora, Këshilli Koordinues i Diasporës Shqiptare dhe vendosmërinë e tyre për të kontribuar në mënyrë të gjithanshme për kombin tonë. Ai shprehu bindjen tek vlera e votës së diasporës, themel për ndryshimin, zhvillimin, demokracinë; domosdoshmëri për të ardhmen e Shqipërisë. Në këtë kuadër, roli i diasporës do të jetë edhe më kyç kur ajo të marrë të drejta të plota për të votuar.", tha Berisha.
