Santos nuk do ta tërheqë fanellën me numrin 10 të Pele. Në fakt mendohej se klubi brazilian do të merrte vendimin që askush tjetër të mos e kishte më fanellën e mbajtur dikur nga Pele. Por në fund ka rezultuar ndryshe. Lajmin e ka bërë të ditur Globo Esporte. Sipas tyre vendimi lidhet me një dëshirë të vjetër të vetë “O'Rey”. Një vendim delikat në fakt për tu marrë, sepse ka qenë vetë familja e Pele që kishte propozuar tërheqjen e fanellës. Ky propozim përfundoi në këshillin konsultativ të Santos. Por një deklaratë e vjetër e fenomenit brazilian, që sapo është ndarë nga jeta, i dha fund diskutimit.
Në një intervistë me youtuber Bolivia Zica në vitin 2017, ish-lojtari u pyet mbi këtë cështje. Idea ishte nëse do të dëshironte ta shihte fanellën me numrin 10 të Santos të tërhiqej. Pele ishte i bindur në përgjigjen që dha e ajo ishte: "jo". Kështu, presidenti Andres Rueda ka zgjedhur të zbatojë vullnetin e Pele, shkruan Globo Esporte. Numri 10 është e do të vazhdojë të frymëzojë lojtarët e skuadrës së Santos me madhështinë e asaj që ka ndërtuar O'Rey.
Lexo më tej: FOTO/ Bruno Guimaraes futet në fushë me fanellën e Pelé: Newcastle e lejon në shenjë respekti
FUTBOLLI HUMBI MBRETIN E TIJ
Legjenda e futbollit Edson Arantes do Nascimiento Pelé u nda nga jeta në moshën 82-vjeçare. O’Rey ishte viktimë e kancerit të zorrës së trashë . Ylli brazilian e kishte luftuar këtë sëmundje që nga viti i kaluar. Shëndeti i tij ishte komplikuar ditët e fundit. Ai kishte ndaluar së reaguari ndaj kimioterapisë dhe po merrte kujdes paliativ në spitalin Albert Einstein në Sao Paulo.
Në nder të legjendës braziliane dhe asja që ai ka dhënë për futbollin, Fifa ka kërkuar një minutë heshtje në të gjithë fushat e botës për Pele. “Për sa kohë të luhet futboll, Pele do të mbahet mend dhe do të na mungojë”. Në një shënim për të gjitha federatat anëtare, FIFA ka bërë thirrje që të respektohet një minutë heshtje para çdo ndeshje në të gjitha fushat e futbollit, këtë fundjavë dhe në vijim, për të bërë homazhe për legjendën braziliane që u nda nga jeta në moshën 82-vjeçare. “Më 29 dhjetor 2022, bota e futbollit humbi Mbretin e saj – thuhet në letër – Edson Arantes do Nascimento, i njohur me dashuri nga komuniteti i futbollit dhe nga të gjithë si Pelé, ishte një ikonë futbolli si askush tjetër”.
