Të veshësh fanellën e kombëtares është ëndrra pak a shumë e të gjithë futbollistëve. Por të jesh në gjendje të zgjedhësh se cilën fanellë të veshësh, nga ajo e katër kombëtareve të ndryshme, nuk është një gjë e përditshme. Ky është rasti i Michael Olise, mesfushorit 21-vjeçar dhe yllit të ri të Crystal Palace. Në fakt, një lloj krahu i hekurt po zhvillohet mes një pokeri kombëtarësh të gatshëm të bëjnë gjithçka për ta pasur në radhët e tyre.
Origjina e lojtarit të lindur në 2001, protagonist me fanellën e Crystal Palace të drejtuar nga Patrick Vieira, është multietnike. Aq sa ai mund të përzgjidhet për deri në katër ekipe të ndryshme kombëtare. Mesfushori në fakt ka lindur në Londër. Por në Angli ka lindur nga një familje franceze. E kjo familje franceze ka origjinë nigeriane dhe algjeriane. Sipas Daily Mail, trajnerët e kombëtareve të ndryshme tashmë kanë zbritur në fushë për të folur drejtpërdrejt me lojtarin. Idea është për ta bindur Olise të luajë për përzgjedhjen e tyre. Për momentin ai ka veshur fanellën e ekipeve të të rinjve U18 dhe U21 të Francës, por për të ardhmen asgjë nuk është e vulosur.
SFIDA FRANCË-ANGLI
Sipas të mirë informuarve, dyshimi i Olise është i kufizuar vetëm në dy kombëtare: Franca dhe Anglia. Franca është vendi i origjinës së familjes së tij. Fakti që mesfushori ka luajtur në skuadrat e të rinjve e bën Les Bleus favorit. Nga ana tjetër, fakti që Gareth Southgate është ekspozuar vetë për ta pasur me kombëtaren e Tre Luanëve, mund ta shtyjë lojtarin e Crystal Palace drejt një ndryshimi të bujshëm kursi. Pak shanse për dy kombëtaret afrikane. Olise tashmë ka refuzuar thirrjen e Nigerisë për Kupën e Kombeve Afrikane 2022.
Sigurisht që është një paradoks. Ka lojtarë që nuk do të kenë kurrë mundësi të shkojnë në kombëtare. E ka nga ata, si Olise apo Januzaj në të kaluarën, që kanë mundësinë të zgjedhin mes katër opsioneve të ndryshme…
