Mori detyrën një ditë më parë, menjëherë në punë. Trajneri i ri i kuqezinjve Sylvinho, ka bërë lëvizjen e parë, në tentativë për të koordinuar strategjitë. Braziliani së bashku me dy ndihmës-trajnerët e tij, Pablo Zabaleta dhe Dorival Guidoni Junior kanë zhvilluar një takim, me të gjithë trajnerët e ekipeve kombëtare të moshave.
Në këtë takim ishin të pranishëm trajneri i Kombëtares së vajzave, Armir Grima, trajneri i Kombëtares U-21, Alban Bushi, trajneri i Kombëtares U-19, Armando Cungu, trajneri i Kombëtares U-18, Ardi Behari, trajneri i Kombëtares U-17, Ervin Bulku, trajneri i Kombëtares U-16, Agron Kërçova, trajneri i Kombëtares U-15, Armand Damo, trajneri i Kombëtares U-19 për vajza, Kreshnik Krepi, trajneri i Kombëtares U-17, për vajza, Agustin Kola si edhe drejtori i Departamentit të Ekipeve Kombëtare në FSHF, Dritan Babamusta dhe menaxheri Denis Lilo.
STRATEGJIA E TEKNIKUT SYLVINHO
Pas prezantimit, trajneri Sylvinho u shpreh optimist për këtë bashkëpunim të ri. Braziliani shfaqi entuziazmin e tij për këtë aventurë të re me Shqipërinë. 48 vjeçari theksoi se bashkëpunimi mes trajnerëve të ekipeve kombëtare të moshave dhe Kombëtares A do të jetë shumë i ngushtë. Kjo si një mënyrë për të përgatitur dhe afirmuar sa më shumë lojtarë të talentuar.
Gjithashtu, Sylvinho u njoh edhe me mënyrën e organizimit të gjithë ekipeve të të moshave. Si dhe për programin apo metodologjitë stërvitore që ato aplikojnë gjatë vitit. Tekniku mori informacion edhe për mënyrën se si monitorohen elementët e spikatur, të cilët aktivizohen veçanërisht jashtë vendit.
Trajneri i Kombëtares theksoi se qëllimi i përbashkët është i njëjtë: për të afirmuar sa më shumë futbollistë të rinj. Natyrisht, edhe për të marrë sa më shumë rezultate pozitive me të gjitha ekipet kombëtare të moshave. Takime të ngjashme do të jenë periodike, në një kohë që stafi i ri teknik përgatitet për nisjen e eliminatoreve të Europianit Gjermani 2024 në muajin mars.
