Janë luajtur pa surpriza të mëdha dy ndeshjet e para të së mërkurës për turin e dytë të Kupës së Shqipërisë. Egnatia ka shkuar të fitojë 0-1 në Korçë përballë Skënderbeut, me një gol të Paulauskas. Rrogozhinasit hedhin kështu një hap të sigurtë drejt çerekfinaleve. Ka barazuar pa gola ndërkohë Kukësi në Loni Papuçiu përballë Apolonisë.
Dy skuadrat e Superiores do ta kenë më të thjeshtë në fushën e tyre në kthim, pavarësisht se rezultati mbetet i hapur. Egnatia ia doli të marrë fitoren në minutat shtesë, në vajtjen e turit të dytë. Pavarësisht se tekniku Shpëtim Duro kishte bërë turnover, rrogozhinasit ia kanë dalë të kalojnë Skënderbeun. Vendosi një gol i blerjes së re, Paulauskas, i cili debutoi në mënyrën më të mirë: "Paulauskas ka realizuar gol si një sulmues tipik - vlerësoi Duro pas ndeshjes -. Akoma nuk kemi panoramën e qartë që të japim një vlerësim 100%. Por ishte pozitive për skuadrën dhe për atë si futbollist".
[video width="992" height="532" mp4="https://cdnimpuls.com/lapsi.al/wp-content/uploads/2023/01/goli.mp4"][/video]
Ndeshja ishte shumë e ekuilibruar, por Egnatia ishte më kërkuese, në tentativë për ti thjeshtuar gjërat në kthim. Ruçi ndali të gjitha goditjet në portën e tij, deri në minutat shtesë. Paulauskas vendosi ndeshjen me një diagonale të pakapshme, që bën optimist teknikun: “Jam i kënaqur, edhe pse kishim rotacion thuajse të plotë - tha Duro -. Nuk patëm shumë situata por ishim më superiorë se kundërshtarët. Ia dolëm të ishim në avantazh duke shënuar në minutat e fundit në një ndeshje me sistem eliminimi".
Në ndeshjen tjetër në Fier, Apolonia bëri rezistencë më shumë se mendohej përballë Kukësit. E megjithatë 0-0 në Loni Papuçiu favorizon veri lindorët në kthim. Pavarësisht disa rasteve nga të dyja ekipet, asnjëra prej tyre nuk arriti të shënojë në portën e kundërshtarit. Ndeshjet e kthimit do të luhen më 2 shkurt.
