Java e 17 e Superiores dikujt i dhuroi buzëqeshje e dikuj jo, me të tjerë që mund të kishin marrë më shumë. Ka nga ata që mjaftuan me verdiktin e fushës, duke shënjestruar edhe ndonjë episod arbitrimi. Më keq ka shkuar për skuadrat e Partizanit e Kukësit, në situata të ndryshme, por njësoj në vështirësi për objektivat që kanë. E tani për të ndryshuar kursin ka fare pak ditë në dispozicion. Në mesjavë luhet java e 18 e kampionatit.
EFEKTI BALAJ
Në tërësi një javë krejtësisht në favor të Tiranës e Vllaznisë. Ndoshta jo rastësisht rezultati ishte i njëjtë për të dy 4-1. Pokeri i Tiranës nuk shërbeu vetëm për të marrë kreun e renditjes, por edhe për të treguar supremacinë. Nëse në dy javët e 2023 bardheblutë kaluan nga -4 në +1 ndaj Partizanit, në dritën e gjithë problemeve të mundshme edhe brenda skuadrës, atëherë me cështjet e zgjidhura, edhe të merkatos, skuadra e Orges Shehit mund të bëhet e frikshme. Të njëjtën ndjesi tentoi të imponojë edhe Vllaznia, në ditën e debutimit të Bekim Balaj. Sulmuesi nuk shënoi asnjë nga katër golat, por mjaftoi prezenca për të karikuar gjithë ambjentin. Tani kuqeblutë janë me distancën e vetëm një ndeshje nga kreu.
KRIZA E KUKËSIT
Të dërrmuar janë Bylis e Kukësi, me blutë që për herë të parë detyrohen të pranojnë se nuk janë në lojë për asgjë tjetër përvec mbijetesës. Rrahman Hallaçi pati kurajën ta artikulojë, por të gjithë brenda ambjentit duket të reflektojnë. Kuksiani i vërtetë i Kukësit lëshoi një sirenë alarmi, të pamenduar, por më të fortë se kurrë. Egnatia mund të kishte marrë më shumë, Duro u kap me Hamitin: cështje standartesh. Gjithësesi, rrogozhinasit e Erzeni janë në lojë për Europën. Ndërsa Teuta për herë të parë prek zonën playout, duke dalë nga ajo e rënies. Gjithnjë nëse konfirmimet bëhet edhe në javën e 18.
