Pas rikthimit të Ibrahimovic për të ndriçuar momentin shumë të errët të Milan, vjen një tjetër goditje. Kuqezinjtë e Stefano Pioli duhet të vazhdojnë të bëjnë akoma pa portierin e tyre titullar. Rikuperimi i Mike Maignan, që nuk ka luajtur asnjë ndeshjen për kuqezinjtë që nga 18 shtatori, po ecën ngadalë. Portieri francez pothuajse me siguri do të mungojë për ndeshjen e parë të 1/8 të Ligës së Kampionëve kundër Tottenham. E te Tatarusanu besimi mungon.
Lajmin e raporton La Gazzetta dello Sport. Sipas saj, testeve që iu nënshtrua Maignan dje, treguan përmirësime, por jo kthim të shpejtë. Pas një ndalese kaq të gjatë, Milan nuk dëshiron të rrezikojë probleme të reja. E për këtë arsye duhet kujdes maksimal. Kështu, data e re e rrethuar me të kuqe në kalendar është 8 Marsi, dita e ndeshjes së kthimit ndaj Spurs.
Lexo më tej:Rafael Leao në dalje nga Milan, thyhen raportet me Maldini: pengesë e pakapërcyeshme klauzola e lirimit
Një tjetër shtyrje për rikthimin në fushë në një sezon vërtet të mallkuar për portierin francez. Maignan u dëmtua me kombëtaren e tij në shtator dhe një muaj më vonë, kur rikthimi dukej afër, ndaloi sërish. Këtë herë për shkak të një dëmtimi të soleusit. Shqetësim në të njëjtin pulpë, por një rrugë tjetër muskulore dhe rehabilitimi që filloi nga e para.
Pas pasigurive të Tatarusanu në fushë, një dritë e re u pa në fund të tunelit me grumbullimin në Dubai. Maignan u duk gati për rinisjen e kampionatit, por probleme të reja erdhën në Emirate. Jo një dëmtim tjetër, por reagim i dobët ndaj ngarkesave të punës që ngadalësuan gjithçka. Tani nga kontrollet dëmi është në përmirësim, por rikthimi në fushë shtyhet akoma.
