Dani Alves, aktualisht në burgun Brians 1 në Barcelonë pas akuzave për sulm seksual, ka kërkuar lirim me kusht. Por pozitat e tij janë përkeqësuar dhe vështirë se kërkesa mund t'i realizohet. Siç raporton El Periodico, gjurmët e lëngjeve trupore (ADN-së) kanë të njëjtin profil gjenetik me brazilianin. Ato janë marrë nga trupi i viktimës, rrobat e saj dhe nga dyshemeja e dhomës së përdhunimit të dyshuar.
Kështu, testi i ADN-së do të vërtetonte akuzat e gruas. Kjo edhe për shkak të pozicionit të vetë Dani Alves, që ka ndryshuar vazhdimisht versionin e tij të fakteve. Edhe animi i çështjes ka shkuar shpesh në të dy krahët, me brazilianin që ka videon e diskos në favor. Kjo sipas avokatëve të tij që pretendojnë se vajza, aty, dëshmohet se ka shkuar vetë në tualetin ku ka ndodhur ngjarja.
Lexo më tej: Çështja Dani Alves, Gjykatësi e fundos: “Prova fajësie më se të mjaftueshme”
Për këtë arsye, për momentin si Prokuroria e Gjykatës së Barcelonës ashtu edhe avokatët e viktimës së pretenduar, po kërkojnë me forcë që braziliani të mos gjykohet i lirë. Sipas tyre ekziston rreziku i arratisjes, duke qenë se Dani ka edhe pasuri e prona të paluajtshme edhe në Brazil. Për më tepër në vendin amerikanojugor nuk ekziston një traktat ekstradimi për këto vepra.
