Alberto Zaccheroni iu nënshtrua një operacioni në kokë për të hequr një hematomë. Ish-tekniku u rrëzua të premten dhe përplasi kokën dhunshëm në tokë. Gjendja e ish-trajnerit, kampion i Italisë me Milan në sezonin 1998-1999, raportohet se po përmirësohet. Sipas asaj që shkruan Corriere della Sera, situata është optimiste, edhe pse prognoza mbetet e rezervuar në spitalin “Bufalini” në Cesena. Ende nuk është e nëse rrëzimi që solli dëmtimin në kokë, është shkaktuar nga një sëmundje e mëparshme. Apo nëse Zaccheroni ka qenë viktimë e një aksidenti të pafat në shtëpi.
Zaccheroni, 69 vjeç, u gjet në dysheme pranë një shkalle të brendshme në shtëpinë e tij. Ajo që e gjeti ishte bashkëshortja e tij Franca dhe nusja e djalit të tyre, të cilat menjëherë thirrën për ndihmë. Zaccheroni, sipas asaj që mësohet, nuk është më në rrezik për jetën.
E ndërkohë nga bota e futbollit kanë vërshuar mesazhet e afërsisë, e fundit nga trajneri i UdinesesSottil: "Më vjen shumë keq dhe më trishtoi kur lexova atë që ndodhi. Një episod fatkeq. E njoh Zaccheronin, një person shumë i mirë dhe një trajner i madh. Këtu ai bëri gjëra të jashtëzakonshme. Unë jam pranë tij dhe e gjithë familja Udinese është afër tij. I uroj atij fat të mirë në shërimin e tij".
Suksesi më i madh në karrierën e teknikut Zaccheroni, ka qenë udhëheqja e Milan drejt titullit kampion. Italiani ka drejtuar, ndër të tjera, edhe Venecia, Bolonja, Udinese, Lazio, Inter, Torino dhe Juventus. Me kombëtaret ai ka eksperiencën me Japoninë, me të cilën fitoi Kupën e Azisë në 2011.
