Bylis nuk zhgënjen traditën e cuditshme të këtij sezoni me rivalin më armiqësor të tyre Laçin. Ballshiotët kanë marrë fitoren e dytë në dy transfertat me bardhezinjtë, që nga ana e tyre kanë fituar sfidën në Ballsh. Përfundon 0-1 në javën e 22 të Superiores, me një gol klasi në minutën e 54'. Ruçi vendosi ndeshjen me një trinë të jashtme që shtangu Selmanin dhe ktheu skuadrën e Shensoit te fitorja. Goditje e rëndë për të besuarit e Mezanit, që shpresonin të riktheheshin në garë për Europën. Një humbje me peshë në shtëpi e dyta radhazi në Laç, që përkeqëson shumë renditjen.
Takimi nisi me një ritëm të lartë nga të dyja skuadrat, që kërkonin fitoren. Bardhezinjtë me Guindo nga minuta e parë në fushë, në krah të Shkurtaj, kishin disa raste të pastra për shënim. Në anën tjetër pas dy fitoresh e dy humbjesh, Shensoi donte të përligjte llogaritë. Me 1.5 pikë në ndesje mbijetesa është e sigurtë sipas kosovaro-turkut. E Bylis luajti me kujdesin e një skuadre që nuk kërkon aventura. Megjithatë, nëse në pushim shkohet në ekuilibër, Shensoi duhet të falenderojë Teqjan që ndali Guindon vetëm për vetëm në minutën e 38'. Rasti më i mirë për miqtë ishte i Felipe Souza, që gjeti gatishmërinë e Selmanit, 6 minuta nga fundi.
[video width="1000" height="560" mp4="https://cdnimpuls.com/lapsi.al/wp-content/uploads/2023/02/ruci.mp4"][/video]
RUÇI NGJITET NË KATEDËR
Laçi humbi shumë pasi doli nga dhomat e zhveshjes, me Bylis që e kuptoi se mund të merrte më shumë se një pikë. E në minutën e 54’ Ruçi i shfaqur përballë portierit, finalizoi plot elegancë. Një gol që mund të vendosë shumë për fatet e të dy skuadrave. Laçi nuk pati forcë të reagonte, ndërsa mallakastriotët u kujdesën për të ruajtur rezultatin.
Kështu Bylisi largohet për momentin nga zona e ftohtë e mbijetesës duke shkuar në vendin e 7 me 26 pikë. Një arritje e rëndësishme, në linjën e llogarive të Shensoit. Ndërsa Laçi lëshon akoma dhe më shumë terren në garën për Europë, i gjashti me 29 pikë. Mezani tashmë rrezikon sërish të bëhet pjesë e garës për mbijetesë.
