Gjykata e Apelit në Prishtinë ka nxjerrë vendim me të cilin vërtetohet aktgjykimi i shkallës së parë me të cilin ish-ministri i Administratës dhe Vetëqeverisjes Lokale nga Lista Serbe, Ivan Todosijeviç, është dënuar me një vit burg për nxitje të urrejtjes, kombëtare, racore, ndarje fetare, etnike apo intolerancë.
Todosijeviç është dënuar nga Gjykata Themelore në Prishtinë me një vit burgim më 19 tetor 2022. Në vendimin e apelit thuhet se janë të pabazuara pretendimet e Prokurorisë lidhur me verifikimin e gabuar dhe jo të plotë të gjendjes faktike për të cilën Prokuroria pretendon se ka shkaktuar shkelje të ligjit penal dhe që i referohen riklasifikimit të veprës penale.
Gjykata e apelit ka konstatuar se gjykata e shkallës së parë ka konstatuar gjendjen faktike dhe ka vepruar drejt kur e ka riklasifikuar veprën penale dhe kur e ka shpallur fajtor Todosijeviçin për veprën penale nga neni 147 paragrafi 1 i KPRK-së. Kolegji i ankesave i konsideroi të pabazuara pretendimet e mbrojtjes se në rastin konkret nuk ishte vepër penale, por vepër verbale, pra e drejta e lirisë së shprehjes.
