Derbi ka shkuar mirë për Partizanin vetëm në fushë, edhe pse më keq e pati Tirana e mundur në fushë dhe e goditur nga Disiplina. Incidentet e ndodhura në Air Albania në derbin mes Partizanit dhe Tiranës kanë marrë goditjen e fortë nga Komisioni i Disiplinës në FSHF. Gjoba të forta, për shkak të situatave të përsëritura, por edhe masat e rënda disiplinore ndaj klubeve.
Kështu, Disiplina ka vendosur edhe mbylljen e stadiumeve për të kuqtë dhe bardheblutë. Partizani duhet të luajë dy ndeshje pa ftifozë dhe Tirana katër, si sinjal i qartë se nuk tolerohen më sjellje të cilat janë bërë përsëritëse. Ndërkaq, bie në sy se ka pasur masa të rrepta edhe për skuadra të tjera ku janë ndeshur probleme me veprimet e tifozerisë, si ato të Erzenit dhe Egnatias.
Lexo më tej: Hodhën flakadanë në fushë gjatë ndeshjes Partizani-Tirana, nën hetim tre tifozë
Disiplina, Vendimet e datës 08.03.2023
KF Egnatia, për sjellje të gabuar të spektatorëve duke hedhur sende në terrenin sportiv, në bazë të nenit 65/1 dhe 65/3/c të KDS, dënohet me gjobë në masën 50.000 (pesëdhjetë mijë) lekë.
KF Erzeni, për sjellje të gabuar të spektatorëve duke hedhur sende në terrenin sportiv, në bazë të nenit 65/2, 65/3/c dhe 65/3/h të KDS, dënohet me gjobë në masën 100.000 (njëqind mijë) lekë.
Lojtari i KF Erzeni, Rejnaldo Troplini, për sjellje josportive ndaj kundërshtarit, në bazë të nenit 47/1/d të KDS, dënohet me 3 (tre) ndeshje pezullim nga aktiviteti.
Lojtari i KF Bylis, Xhoele Macolli, për sjellje josportive ndaj kundërshtarit, në bazë të nenit 47/1/d të KDS, dënohet me 2 (dy) ndeshje pezullim nga aktiviteti.
NGJARJET E DERBIT
FK Partizani, për sjelljen e gabuar të spektatorëve duke hedhur sende brenda rrethimit të fushës si dhe dështim në përmbushjen e detyrimeve dhe përgjegjësive që shkaktuan ndërprerje të përkohshme të lojës, në bazë të neneve 50, 63, 64/2, 65/3/a 65/3/c, dhe 65/3/f të KDS, dënohet me zhvillimin e 2 (dy) ndeshjeve pa spektatorë si dhe gjobë në masën 200.000 (dyqind mijë) lekë. FK Partizani, urdhërohet të dëmshpërblejë dëmet e shkaktuara në Stadiumin “Air Albania” sipas akt konstatimit, brenda 15 ditëve.
Zyrtari i KF Partizani, Ervin Hajdari, për provokim të publikut, në bazë të nenit 55/2 të KDS, dënohet me 2 (dy) ndeshje pezullim nga aktiviteti.
KF Tirana, për sjelljen e gabuar të spektatorëve duke hedhur sende brenda rrethimit të fushës si dhe dështim në përmbushjen e detyrimeve dhe përgjegjësive që shkaktuan ndërprerje të përkohshme të lojës, në bazë të neneve 50, 64/2, 65/2, 65/3/a, 65/3/c, 65/3/f dhe 65/4/b të KDS, dënohet me zhvillimin e 4 (katër) ndeshjeve pa spektatorë si dhe gjobë në masën 200.000 (dyqind mijë) lekë. KF Tirana, urdhërohet të dëmshpërblejë dëmet e shkaktuara në Stadiumin “Air Albania” sipas akt konstatimit, brenda 15 ditëve.
