Carlos Tevez ishte një nga sulmuesit argjentinas që bëri më së miri në Europë. E kaluara e tij në Premier League dhe në Serie A është ende në kujtesën e tifozëve të skuadrave ku ai ka luajtur. Megjithatë, Apache ishte gjithashtu në qendër të një transferimi të diskutueshëm që nuk i pëlqeu askujt. Kalimi nga Manchester United te Manchester City është ende objekt diskutimi dhe sulmuesi ka zbuluar arsyet e kësaj zgjedhjeje.
Sezoni 2008-09 po i afrohej fundit dhe Carlos Tevez ishte në skadencë kontrate me United. Sheiku i Manchester City bëri një blitz të vërtetë për ta bindur argjentinasin. Siç tha sulmuesi për ESPN, sheiku bëri gjithçka për të marrë aprovimin e tij: "Ai më çoi mua dhe familjen time në Abu Dhabi me një avion privat. U takuam dhe rregulluam çdo detaj".
Lexo më tej: Rrëfimi i Rooney: “Ronaldo i bezdisshëm, Ferdinand arrogant, Tevez zhgënjimi më i madh i jetës”
E gjitha në kohën kur Djajtë e Kuq po përgatiteshin të përballeshin me Barcelonën në finalen e Ligës së Kampionëve në Romë. “Kur ia thashë Ferguson ishte si një goditje me thikë pas shpine për të. Më herët më kishte thënë se do të kujdesej për rinovimin e kontratës time. Kur i thashë se po refuzoja dhe do të shkoja te City, ishte një goditje e madhe për të. Por unë kisha vuajtur sepse më kishte trajtuar keq atë sezon. Më erdhi keq sepse të luaja në Old Trafford ishte si të luaja në Bombonera për mua”.
