Kryekomisioneri Ilirjan Celibashi ka folur sërish për vendimin që mori sot për mos regjistrimin e Partisë Demokratike si subjekt zgjedhor. Celibashi theksoi se të drejtën për të paraqitur kërkesa në KQZ, ligjërisht e ka zoti Lulzim Basha.
“Ka vetëm një Parti Demokratike. Përpara KQZ-së, të drejtën për të paraqitur kërkesa, përfshirë dhe kërkesën për t’u regjistruar si subjekt zgjedhor e ka zoti Lulzim Basha.
Kjo bazohet në dokumente, i vetmi dokument është ai i lëshuar nga Regjistri i Partive Politike, tej këtij dokumenti çdo shprehje tjetër e ligjërimeve nuk është e ligjshme, duhet gjithmonë aspekti dokumentar i faktit.
Pala e interesuar në procesin e regjistrimit e përfaqësuar nga zoti Indrit Sefa, ka paraqitur vërtetimin e Gjykatës së Tiranës ku kryetar i PD është Basha dhe ka një autorizim nga Basha, për të kryer veprimet e nevojshme” – tha Celibashi në emisionin “Opinion”.
Celibashi ka theksuar dhe njëherë që PD zyrtare drejtohet nga Lulzim Basha. Ai ta se edhe në fletën e votimit krahas logos së PD do të shkruhet emri i Lulzim Bashës, pasi zyrtarisht është ende kryetar.
“Ja më thoni ju kush emër do shënohet? Kush mund të ishte emri tjetër që do të shënohej në fletën e votimit përbri Partisë Demokratike? - tha Celibashi.
Ai thekson se zbatuar ligjin për mosregjistrimin e PD së Alibeajt në zgjedhjet e 14 majit dhe se nuk ka cënuar asnjë shtyllë të demokracisë në vendin tonë.
“Ajo çka prevalon para çdo parimi është zbatimi i ligjit. E ka zgjidhur ligji dhe e ka vendosur se çfarë është e drejtë e çfarë nuk është. Kam gjithë keqardhjen, por është e rëndësishme të zbatohet ligji. Nëse zbaton ligjin nuk dëmton pluralizmin dhe as shtyllat e demokracisë”, - tha Celibashi. ©LAPSI.al
