Tre herë kampioni i botës në Formula 1, Nelson Piquet, është dënuar të paguajë pesë milionë realë brazilianë. Gjoba, ekuivalente me rreth 800,000 euro, është për komentet raciste dhe homofobike ndaj Leëis Hamilton. 70-vjeçari brazilian përdori një term racist kur iu referua britanikut në një intervistë të vitit 2021. Piquet më vonë kërkoi falje për komentin e tij "të paqëllimshëm" për pilotin anglez të Mercedes. Duke folur për një episod që ndodhi gjatë GP të Britanisës së Madhe, Piquet akuzoi Hamilton se e pengoi qëllimshëm rivalin e Red Bull, Max Verstappen. Ish-piloti e quajti anglezin "ze*ak i vogël".
Në një intervistë tjetër, Piquet përdori një term homofobik. Fraza u tha ndërsa komentonte humbjen e Hamilton ndaj Nico Rosberg, shokut të tij të skuadrës në 2016. Braziliani saktësoi se "nuk i mbrojti" vërejtjet, por shtoi se termi që ai përdori "ishte përdorur gjerësisht dhe historikisht në gjuhën e folur në portugalishten braziliane si sinonim për 'djalë' ose 'person' dhe nuk kishte për qëllim kurrë të ofendonte".
Lexo më tej: Piquet në qendër të polemikave: shprehje raciste kundër Hamilton, rebelohet F1
Akuzat kundër Piquet u ngritën nga katër grupe të të drejtave të njeriut, përfshirë Aleancën Kombëtare LGBT+ të Brazilit. Ata kërkonin që ish-kampioni të paguante 10 milionë realë brazilianë si dëmshpërblim moral. Një gjykatë braziliane ka vendosur që Piquet duhet të paguajë pesë milionë. Gjykatësi Pedro Matos de Arrudo tha se shuma e kompensimit ishte vendosur "në mënyrë që, si shoqëri, një ditë të mund të çlirohemi nga aktet e dëmshme të racizmit" dhe homofobisë.
