Sa pretendentë për Mateo Reteguin! Shpërthimi i pabesueshëm i sulmuesit italo-argjentinas me Italinë, me dy gola në dy ndeshjet e para kundër Anglisë e Maltës, ka prodhuar një listë të gjatë të të interesuesve. Sulmuesi është në qendër të vëmendjes së klubeve në Itali, por edhe jashtë saj. E Carlos, babai-menaxher, mbërriti në Evropë të hënën për të dëgjuar ofertat nga klubet e ndryshme.
Së bashku me të birin - siç raporton Corriere della Sera - ai ka folur me drejtuesit e Eintracht Frankfurt. Më pas kanë dëgjuar edhe ata të Bayer Leverkusen. Bundesliga avancon për Mateo Retegui, por jo vetëm gjermanët. Edhe Premier League po e thërret. West Ham, i pakënaqur nga Scamacca, ka kërkuar tashmë informacion. Por Mateo, në pronësi të Boca Juniors në huazim te Tigre, ëndërron Italinë. Ndaj në Argjentinë e japin Interin si favorit në garën për lojtarin e lindur në vitin 1999. Zikaltrit në fakt kanë lëvizur muaj më parë, para të gjithëve, duke e mbikqyrur në Argjentinën ku luan bashkë me Colidio, interisti në huazim. E kështu, Marotta ka marrë kontakte me babanë Carlos për ta veshur lojtarin zikaltër.
FOKUSI ZIKALTËR
Në Napoli dhe në Maltë, për dy ndeshjet kualifikuese të Euro 2024, ishte prezent zëvendësdrejtori sportiv i Interit, Baccin. Ai e pa nga afër Mateo Retegui, duke sjellë më shumë se përgjigje pozitive. I ati Carlos tani po planifikon gjithashtu një takim në Milano me drejtuesit e zikaltërve, të cilët dëshirojnë të sjellin lojtarin në Appiano si alternativën e parë për Lautaro Martinez, në vend të Correa.
PROBLEMI I TRANSFERIMIT
Megjithatë, ky nuk është një operacion i lehtë, jo vetëm për shkak të konkurrencës së fortë. Të interesuar janë Milani dhe Lazio, por edhe Atletico Madrid. Pastaj nuk duhet harruar se do të ketë një marrëveshje me dy klube. Tigre, ku është i huazuar deri në dhjetor, tashmë ka njoftuar se do të blejë 50% të çmimit të tij nga Boca Juniors për rreth 2.1 milionë euro. Vlera e Mateo Retegui tani është rreth 15-20 milionë euro.
