Drejtuesi i sektorit konkurrues të të rinjve të Brusaporto, Stefano Turchi, i sëmurë me sklerozë anësore amiotrofike (SAA), është sulmuar me grushte. Gjithcka ndodhi gjatë një debati me prindin e një lojtari të ekipit kundërshtar gjatë ndeshjes në Allievi Elite U 17, mes Brusaporto dhe Uesse Sarnico. Sipas asaj që ka publikuar sot L'Eco di Bergamo, në fund të ndeshjes – siç raportohet në raportin e karabinierëve – prindi i një prej lojtarëve të Uesse Sarnico ka goditur me shkelma dhe grushta drejtuesin e Brusaportos.
Turchi, nga Pistoia, 54 vjeç dhe banues në Val Calepio, ish-lojtar profesionist i Serie A me Ancona, u trajtua në spitalin Seriate. Diagnoza flet për traumë në kokë. Ish-futbollisti zbuloi në vitin 2007 se vuan nga SAA dhe për shkak të vështirësisë në ecje tani lëviz me karrige me rrota: “Kështu, nuk luhet futboll, jam i shkatërruar moralisht”, komentoi Turchi. "Unë jam gjithashtu i frikësuar nga mendimi se një person si unë që e do futbollin dhe që e gjen veten të paaftë për të mbrojtur veten mund të bëhet viktimë e një tragjedie. Unë jam duke menduar të lë gjithçka, të tërhiqem. Pavarësisht se e gjithë jeta ime i është kushtuar futbollit”.
SI NDODHI AGRESIONI, SIPAS RAPORTIT
Turchi, sipas rikonstruksionit nga karabinierët, ishte në fushën e Albano Sant'Alessandro për të ndjekur skuadrën e tij U 17. Një lojtar i Uesse Sarnico u ndje keq dhe kërkoi që të zëvendësohej. Babai i djalit, sipas versionit të Turchi, mori makinën për të marrë djalin e tij dhe ndaloi pas njërës portë në fushë. Djali u shërua dhe vendosi të qëndronte, edhe pse në pankinë. Burri, në vend që të nxirrte makinën dhe të ulej në tribunë, mbeti aty. E ndërsa ndeshja u ndez, filloi të acarohej, të bërtiste dhe të fyente këdo që ishte në fushë. Në atë moment Turchi tentoi ta qetësonte dhe burri iu vërsul ish-futbollistit duke e sulmuar me shkelma dhe grushta. Disa drejtues të Brusaporto ndërhynë për të ndaluar sulmin, mes dëshmitarëve të përmendur në padinë e ngritur te karabinierët.
