Policia italiane ka vënë në pranga një 33-vjeçar shqiptar i shpallur në kërkim ndërkombëtar nga Greqia prej dy vitesh.
Arrestimi i tij u bë në një banesë në Airola pasditen e të mërkurës, 19 prill.
Ngjarja për të cilën akuzohet ka ndodhur vitin 2010.
Shqiptari së bashku me bashkëpunëtorë të tjerë kreu grabitjen në dëm të një të moshuari mbi të tetëdhjetat.
Fillimisht e ka goditur egërsisht me grushte dhe me sende të mprehta dhe më pas pasi i ka lidhur duart dhe këmbët i ka shkaktuar vdekjen nga asfiksia.
Rezultati i grabitjes ishte vetëm 300 euro cash. Për këtë krim ai është dënuar nga shteti grek me burgim të përjetshëm.
Pas arrestimit, shtetasi shqiptar është mbyllur në burgun e Beneventos dhe është vënë në dispozicion të Gjykatës së Apelit, e cila do të vendosë për ekstradimin.
