Në përfundim të procesit për zgjedhjet lokale në veri të Kosovës, Lëvizja Vetëvendosje deklaroi se ka fituar “bindshëm” në garat për kryetarë komune në Mitrovicë të Veriut dhe Leposaviq.
Sipas Armend Mujës, kreut të Lëvizjes Vetëvendosje në Mitrovicë, partia e tij ka fituar mbi 60 për qind të votave në zgjedhjet për kryetarë në katër komunat në veri.
Ai pretendoi se në Mitrovicë të Veriut kanë fituar mbi 65 për qind të votave, ndërkaq në Leposaviq mbi 70 për qind.
“Garë më e ngushtë është në Zubin Potok”, tha ai për mediat. Ndërsa, kandidati i Lëvizjes Vetëvendosje për kryetar të Komunës së Mitrovicës së Veriut, Erden Atiç, tha se ai do të jetë kryetari i ri i kësaj komune.
“Do të jem kryetar komune i të gjithë qytetarëve pa dallim. Po na presin punë të mëdha përpara. U bëj apel të gjithë qytetarëve që të kenë besim në institucionin e komunës dhe në mua si kryetar komune”, tha ai për mediat.
Atiç shtoi se do të bashkëpunojë me të gjitha komunitetet.
Sipas KQZ-së, në zgjedhjet e jashtëzakonshme lokale për kryetarët e Mitrovicës së Veriut, Leposaviqit, Zveçanit dhe Zubin Potokut, votuan 1.567 qytetarë.
Zgjedhjet u bojkotuan nga Lista Serbe, partia serbe që mbështetet nga Serbia, dhe që deri më tani ka udhëhequr katër komunat në veri të Kosovës, të banuara me shumicë serbe.
Sipas të dhënave zyrtare të Komisionit Qendror të Zgjedhjeve në Mitrovicën e Veriut votuan 837 qytetarë apo 4.62 për qind e qytetarëve me të drejtë vote. Në Leposaviq votuan 141 votues apo 1.06 për qind, në Zubin-Potok 385 votues apo 5.78 për qind dhe në Zveçan 204 qytetarë apo 2.92 për qind e qytetarëve me të drejtë vote.
Kreshnik Radoniqi, kryetar i KQZ-së, ka thënë në konferencën për media se Komisioni Qendror i Zgjedhjeve u ka ofruar mundësinë dhe kushtet të gjithë qytetarëve që të ushtrojnë të drejtën e tyre për votë.
