I dërguari i posaçëm për dialogun mes Kosovës dhe Serbisë, Miroslav Lajçak deklaroi se gjithçka që vjeni nga rajoni i Ballkanit për vendet përkatëse, është diçka e mirë, duke iu referuar nismës Ballkani i Hapur.
Në një intervistë për median kroate Veçernji list, Lajçak u shpreh se nisma duhet të jetë gjithëpërfshirëse dhe të ndërtohet mbi vlerat evropiane.
“Është e rëndësishme që të jetë gjithëpërfshirëse, të mos përjashtojë askënd nga procesi dhe të çojë para integrimin drejt BE-së, të ndërtohet mbi vlerat evropiane”, theksoi ai.
Në lidhje me situatën në Ballkan, Lajçak nënvizoi se nuk është realiste të ulen kriteret për pranimin e Bosnje dhe Hercegovinës në BE dhe sjtoi se anëtarësimi nuk është vetëm një vendim politik, por edhe një vendim i bazuar në standarde të caktuara.
“Unë e shoh një zgjidhje në atë që BiH dhe vendet e tjera që aspirojnë anëtarësimin janë gjithnjë e më të pranishme në BE, megjithëse nuk do të merrnin pjesë në vendimmarrje. Ata janë të pranishëm në diskutime dhe se të gjithë janë mësuar me praninë e tyre, tregu i përbashkët i BE-së është hapur”, përfundoi Lajçak.
