Është vetë-dorëzuar në polici këtë të martë 31-vjeçari Habib Rexha, vrasësi i Arian Gosës në Kavajë pasditen e së dielës. Rexha qëlloi me një plumb në kokë Gosën në prani të të atit të moshuar teksa po pinin kafe në një lokal. Rexha u vetë-dorëzua pas afro 48 orësh nga ngjarja e rëndë pas negociatave me familjen e tij. Në një dëshmi paraprake që ai u ka dhënë efektivëve të policisë ka thënë se ngjarja nuk ka qenë e planifikuar më herët dhe se vrasjen e ka kryer pa e menduar gjatë.
“Gjithçka e bëra pa e menduar. E pashë dhe e vrava”, - u ka thënë ai efektivëve të policisë së Kavajës. Ai ka rrëfyer se ditën e ngjarjes ka qenë rastësisht në të njëjtën zonë me Arjan Gosën. Sipas të njëjtave burime 31-vjeçari është shprehur se ka qenë në një makinë me një shokun e tij, i cili nuk ka qenë në dijeni të situatës.
“I kërkova mikut tëparkonte pak metra larg lokalit dhe shkova e qëllova me pistoletën që mbaja me vete” – u ka thënë ai hetuesve. Rexha u ka thënë hetuesve se i ka kërkuar mikut të largohen, duke e lënë diku në dalje të Kavajës.
Autori ka qëndruar në Kukës këto ditë. Pas negociatave me familjarët këta të fundit kanë kërkuar 2-3 ditë kohë për ta bindur djalin e tyre të vetëdorëzohet. Sot, Rexha u vetëdorëzua, madje përmes një video deklaroi se kjo u bë me dëshirën e tij.
Habib Rexha vrau të dielën me një plumb në kokë 48-vjeçarin Arjan Gosa. Habibi është vëllai i Altin Rexhës që u vra nga Armand Gosa në 29 mars në këtë qytet ku edhe vetë Gosa humbi jetën. Gjithçka nisi nga një sherr banal. ©LAPSI.al
