Arkeologu Neritan Ceka ka folur në Euronews për vendimin e rikthimit të Albanologjisë në Akademinë e Shkencave duke arsyetuar mbi efektet negative të studimeve që financohen nga të huajt. Si shembull, Ceka mori rastet e financimit nga francezët, nga grekët apo nga të tjerë akademikë të huaj që ndikojnë në studimet që bëhen, duke sjellë rastin e Kosovës, kur për hir të financimit ka pasur edhe raste kur shtrembërohet historia.
“Kur vjen francezi dhe punon në veri të Shqipërisë me kulturën e Komanit, francezi thotë këta nuk janë arbër, por janë sllavë. Këta antropologët e Kosovës, shkova unë në Kosovë. Në Nëntor, kishin një konferencë të financuar nga francezët dhe nuk u përmend kurrë Dardania. E dini pse nuk e përmendin? Se serbëve u mbetet hatri se teoria e tyre është se në Kosovë nuk kanë ardhur nga Ilirtët, nga Dardanët tek shqiptarët, por se kanë ardh serbët dhe pastaj kanë ardhur shqiptarët. I thashë: Ku jam këtu? A jam në Kosovë? Ore dardanët, ku i keni?” u shpreh Ceka.
Akademia e Studimeve Albanologjike u mbyll dhe studiuesit e saj do të përfshihen në njësitë e Akademisë së Shkencave për të punuar mbi tre projekte të mëdha.
