Aleksandar Vuçiç është shprehur sot se ka qenë delegacioni i Kosovës ai që nuk ka dashur të takohet me delegacionin serb në samitin e Komitetit Politik Evropian në kryeqytetin moldav.
Presidenti i Serbisë ka deklaruar se nga e tyre, gjithnjë ka pasur dëshirë për dialog, por se sipas tij refuzimi nga Kosova “dëshmon se kush është përgjegjës për dhunën në Veri”.
“Nuk u miratua nga liderët e tjerë. Situata në Kosovë, së bashku me Ukrainën, u bë temë kryesore e takimit të Komitetit Politik Evropian. Serbia gjithmonë dëshiron bisedime dhe mua më duket se tani është më e qartë se kush është përgjegjës për dhunën në Kosovë”, u tha Vuçiç gazetarëve.
Sakaq, i pyetur se kur pret një takim dypalësh me kryeministrin e Kosovës, Albin Kurti, ai u përgjigj: Nuk e di!
“Pas kësaj duhet të fokusohemi në themelimin e Asociacionit të komunave me shumicë serbe në Kosovë, që u nënshkrua dhjetë vjet e gjysmë më parë me Marrëveshjen e Brukselit. Besoj se njerëzit tani e kanë një pasqyrë më të qartë të asaj që po ndodh, pavarësisht se a e njohin vendet e tyre Kosovën apo jo”, tha Vuçiç.
“Ne duhet të bindim njerëzit në Ballkan se kompromisi nuk është një gjë e keqe. Nuk është e lehtë, të gjithë janë të radikalizuar dhe askush nuk dëshiron të dëgjojë ide normale”, shtoi ai.
