Pasdite e mbushur me zhvillime të politikës dhe jo vetëm, kjo e martë. Pas arrestimit të ish-kryetarit të Bashkisë së Durrësit, kryeministri Edi Rama ka bërë një reagim të thatë dhe pa ia përmendur emrin.
“Për herë të parë në historinë e popullit tonë po goditen njerëz të lidhur me pushtetin. Kjo nuk është e lehtë. Kjo të bën të ndihesh jo mirë se s’ke si ndihesh mirë kur sheh që dikush që ka qenë përkrah teje, është përkrah avokatit përballë prokurorit apo gjykatësit. Me siguri diçka ka ndodhur” – tha Rama në Berat.
Pas kthimit prej andej, kreu i qeverisë shqiptare mësohet se ndodhet në një darkë me ambasadoren amerikane, Yuri Kim. Darka ka nisur rreth orës 21.00 dhe po mbahet në rezidencën e ambasadës amerikane në Tiranë.
Nuk dihen arsyet e këtij takimi. Kujtojmë se Kim e ka përfunduar mandatin e saj dhe së shpejti pritet të lërë vendin tonë ndërsa Dako është shpallur “non grata” nga DASH. ©LAPSI.al
